كيدي العظيم !! :) :)

بسست ...أيوة أنت

حبيبي أنت

!!تعالى بس...هأقولك على سر خطير

 !!بس أوعدني يا عمري يبقى في بير

 !!بصراحة كده...أنا ناويلاك على نية 

!!أيوة..شايلاها هنا جوايا و مخبية

عايزاك تبصم كدهه بالعشرة

بعد العشرة

إنك قبلي كنت واخد القاضية

 !!و عدت عليك الدنيا العشرة

إنكمن غيري كنت فاقد للهوية

فاقد للأهلية

!!لحد ما وقعت كده و طبيت فيه

فقت من غيبوبتك بس

لما اقسمتلي إنك علطول ليه

عايزاك تكتشف إن حتى الميه

اللي من غير طعم

معايا تدوقها تتحير

..و لون السما و ريحة الهوا

! ايه..ازاى  فجأه كله كده اتغير ؟

حتى أكثر لون في يوم كرهته

!علي بس تلاقي نفسك فجأه عشقته

!والأكل اللي ياما قلت ..ارحموني مش بحبه

!!من إيديا تاكل صوابعك بس بعدمّا دقته

وكل شئ وأى شئ

في يوم جربته

صدقني والله هيبقى في حبي

!ولا كأنك أصلا عرفته

عارف الحروف؟؟

أيوة دى اللي تعلمتها زمان

المترصصه في صفوف

منى أنا تبقى غنوتك

و بيرددها قلبك الملهوف

!و كمان صحابك

وكل حد شغل في يوم حياتك

بكرة تلاقي قلبك بيقولهم

 !متطولوش..أنتم ضيوف

فما تعاندش و ماتعارضش

وسبني أرتبلك 

كراكيب حياتك و ذكرياتك

 !!سلم بقى

ده معايا لا هيبقى فيه قلق

ولا أى خوف